ಫೋಟೋಶೂಟ್ ಪನ್ಪಿನ ಮರ್ಲ್ ಗ್ ಕಜವು ಆವೊಂದುಂಡಾ ನಮ್ಮ ತುಳುನಾಡ ಆಚಾರೊ ಇಚಾರೋ??

ತುಳುನಾಡ್ ಪಂಡ ಪಂಚವರ್ಣದ ಪುಂಚದ ಮಣ್ಣ ಬೂಡು. ಮುಲ್ತ ಆಚಾರೋ ಇಚಾರೋ ಸಂಪ್ರದಾಯೊ ಅವೆತೊಟ್ಟಿಗೆ ಬುಲೆತಿನ ನಮಕ್ ಕುಸಲ್ ಆಂಡ ಪಿದಯಿಡ್ ತೂಪಿನಾಯಗ್ ಅವ್ವೊಂಜಿ ಅಚ್ಚರಿದ ಸಂಗತಿ. 

ಕೋಲ, ಕಂಬುಲ, ಕೋರಿದ ಕಟ್ಟ, ಮಾರ್ನೆಮಿ, ಕೆಡ್ಡಸ ಪನೊಂದು ಪೋಂಡ ದಿನ ಯಾವ ನಂಕ್. ಆಂಡ ಯಾನ್ ಇನಿ ಬರೆಯರ ಬೈದಿನ ನಮ್ಮ ಕೋಲದ ಬಗ್ಗೆ.

ಕೋಲ ಯಾನಂತು ಕಿನ್ಯ ಪ್ರಾಯೊಡು ಉಪ್ಪುನಗ ಅಮ್ಮನ ಸೆರಂಗ್ದ ಉಲಯಿರ್ದ್ ಮೆಲ್ಲ ತೂತಿನ ನೆಂಪು. ಅದಗ ಒಂಜಿ ಏಳ್ ವರ್ಷ ಪ್ರಾಯ ಆದುಪ್ಪು. ಕೋಲ ಕಟ್ಟುನಾರ್ ಮೋನೆಗ್ ರಂಗ್ ಪಾಡುನಗ ಅರೆನ ಬೆತ್ತಡಿಡ್ ಪರದೆನ್ ಮೆಲ್ಲ ಜಾರಾದ್ ಆರ್ ಎಂಚ ಪಾಡೋನುವೆರ್ ಪಂದ್ ತೂವೊಂದು ಉಪ್ಪುನಗ ಪೊಪ್ಪ ಬತ್ತ್ ನೆರ್ತಿನವ್ವು ಇತ್ತೆಲ ಸುರುಕು ನೆಂಪು ಬರ್ಪಿನವ್ವು. ಆರ್ನ ಬಾಯಿಡ್ ನೆರಡೆ ತಿಂದ್ ಅಲ್ಪರ್ದ್ ಅಜ್ಜೆರೆನ ಇಲ್ಲಡ್ ದಾದಾಂಡ್ಲ ತಿನರೆ ತಿಕ್ಕುಂಡಾ ತೂಕ ಪಂದ್ ಚಿಕ್ಕಮನ ಜೋಕ್ಲೆನ ಒಟ್ಟಿಗೆ ಅಡಿಗೆದ ಕೋಣೆಣ್ ರಾತ್ರಿ ಒಂಜಿ ಗಂಟೆಗ್ ನಾಡುದಿನವ್ವು ಅಂತೂ ಮದಪಂದಿನ ಇಸಯ. ಕಿನ್ಯ ಪ್ರಾಯೊರ್ದೆ ನಮ್ಮ ಸಂಸ್ರೃತಿ ಪಂಡ ದಾದನೋ ಒಂಜಿ ಅಭಿಮಾನ. ದೂರದ ಬೆಂಗಳೂರ್ಡ್ ಕುಲೊಂದು "ನಾವು ಪಕ್ಕ ಮಂಗ್ಳೂರು" ಪನ್ನಗ ಆಪಿನ ಕುಶಿ ಬೇತೆ ದಾದ ಕೊರ್ಂಡಲಾ ತಿಕ್ಕಂದ್. ಅಂಚನೆ ಪರ್ಬೊಗು ಬತ್ತ್ ದ್ ಮೂಜಿ ದಿನ ಇಲ್ಲಡ್ ಕುಲ್ಲುನಗ ಸ್ವರ್ಗೊಗೆ ಬತ್ತಿನಲೆಕ. 

ದಾಯೆಗೊ ಈ ದೈವಲೆನ ಮೂಲಕಥೆ ಕೇನುನ ಪಂಡ ಎಂಕ್ ಭಾರಿ ಇಷ್ಟ, ಪೊಪ್ಪ ಉಪ್ಪುನಗ ಕುಲ್ಲಾದ್ ಮುದೆಲರ್ದ್ ಕಡೆಮುಟ್ಟ ಪನ್ಪೆದೆರ್ ಆಂಡ ಆರ್ಲ ಪೋಯಿಬೊಕ್ಕ ಯ್ಯೂಟ್ಯೂಬ್ ನಾಡುನ ಒಂಜಿ ಕಜ್ಜೊ ಸುರು ಆಂಡ್ ಅಂಚನೆ ಒಂಜಿ ದಿನ ವಿಡೀಯೋ ತೂವೊಂದಿತ್ತಿನಾಲ್ ತತ್ತ್ ಕಮೆಂಟ್ ತೂನಗ ಅವೆಟ್ ಕೆಲವು,

"ಲೋ ಅವ್ನಿಗೆ ಪೀಟ್ಸ್ ಹಿಡ್ದಿರೋದು ಕಣ್ರೋ ಆಸ್ಪತ್ರೆ ತಗೊಂಡೋಗೋ ಬದ್ಲು ಪೂಜೆ ಮಾಡ್ತಿದ್ದೀರಲ್ಲಾ?"

"ಇಂತ ಡೋಂಗಿಗಳಿಂದಾನೇ ಇವತ್ತು ಇಷ್ಟೊಂದು ಜನ ಮೋಸ ಹೋಗ್ತಿರೋದು"

"ಮೊದ್ಲು ಇವ್ನ ಮೇಲೆ ಪೊಲಿಸ್ ಕಂಪ್ಲೇಂಟ್ ಮಾಡ್ಬೇಕು"

ಇಂಚಿನ ಕೆಲವು ತೂಯೆ, ನಮ್ಮ ಸಂಸ್ರೃತಿ ಸಂಪ್ರದಾಯ ಕಜವು ಆನಗ ಏರೆಗ್ ಬೇಜಾರಾವಂದೆ ಉಪ್ಪು ಪನ್ಲೆ? ಎಂಕ್ಲಾ ಅವ್ವೆ ಆಂಡ್. ಜನಕ್ಲು ದಾಯೆ ನಮ್ಮ ನಂಬಿಕೆಗ್ ಮರ್ಲ್ ಪನೊಂದುಲ್ಲೆರ್ ಪಂದ್ ಮಸ್ತ್ ಯೋಚನೆ ಮಂತೆ.. ಅಪನಗ ಕೆಲವೊಂಜಿ ವಿಚಾರ ತೆರಿಂಡ್. 

ದುಂಬುದ ಕಾಲೊಡು ಫೋನ್ ಇಜ್ಜಂಡ್ ಒವ್ವೇ ಒಂಜಿ ಕೋಲ ನೇಮದಲ್ಪ ಕಾಲದಿದಲ್ಪ ಕುಟುಂಬದ ಪತ್ತಪ್ಪೆ ಜೋಕುಲು ಒಂಜಾದ್ ಕೈಮುಗಿಯೊಂದಿತ್ತೆರ್ ಭಕ್ತಿ ದಿಂಜಿದ್. ಆಂಡ ಕಾಲ ಬದಲಾವೊಂದು ಪೋಯಿಲೆಕನೆ ನಮಲಾ ಬದಲಾಯ ಜೋಕ್ಲೆನ ಕೈಟ್ಲಾ ಮೊಬೈಲ್ ಬತ್ತಿಂಡ್ ಕೆಬಿಕ್ ಪದ್ಯ ಕೇಂಜಿಂಡ ನಿದ್ರೆ ಬರ್ಪುಜಿ, ನುಪ್ಪುನು ಸ್ಟೇಟಸ್ ಪಾಡಿಜಿಂಡ ಬಂಜಿಗ್ ಪೋಪುಜಿ ಪನ್ಪುನಾತ್ ನಮ ಬದಲಾಯ. ಉಂದೆತ ಪೂರ ಪರಿಣಾಮ ನಮ್ಮ ಬದ್ಕ್ ದ ಮಿತ್ತ್ ಬೂರುನಗ ನಮ್ಮ ನಂಬಿಕೆದ ಮಿತ್ತ್ ಬೂರಂದೆ ಕುಲ್ಲುವ?? ಮುಲ್ಪನೇ ನಮ ಸಾದಿ ತತ್ತಿನಿ. 

ಕುಟುಂಬದ ನೇಮ ಕೋಲಡ್ ಕಾಲದಿಡ್, ಸತ್ಯನಾರಾಯಣ ಪೂಜೆಡ್, ಗಣಹೋಮಡ್ ನಮಲಾ ಏರೆಗ್ಲಾ ಕಮ್ಮಿ ಇಜ್ಜ ಪಂದ್ ನಮ್ಮ ಇಲ್ಲದ ಗಡ್ದ್ ಗಮ್ಮತ್ತ್ ಪೂರೆನ್ಲಾ ಸ್ಟೇಟಸ್ ಡ್ ಪಾಡರ ಸುರು ಮಂತ. ಅಂಚನೆ ಕೋಲಡ್ ದೈವೊದ ನಲಿಕೆಲ ಫೇಸ್ಬುಕ್ ವಾಟ್ಸಾಪ್ ಬತ್ತ್ಂಡ್. ಇಂಚ ಬತ್ತಿನವೆನ್ ಕೆಲವೆರ್ ಸಸಾರಡು ಗೆತೊಂದು ದಾದ ದಾದಾನೋ ಬರೆದ್ ಪಾಡೆರೆ ಸುರು ಮಂತೆರ್. ನಮ್ಮ ಕೋಲ ದಾದನೋ ಲೋಕೊರ್ಮೆ ಪರಡಿಂಡ್ ಅಂಡ ಜನಕ್ಲೆಗ್ ಅವ್ವು ಕೋಲ ಆದ್ ಪೋವಂದೆ ಒಂಜಿ "ಕಾಮಿಡಿ ಡಾನ್ಸ್" ಆದ್ ಪೋವರ ಸುರು ಆಂಡ್. ನಮ್ಮ ಕಣ್ಣೆದುರ್ಡೆ ನಮ್ಮ ನಂಬಿಕೆ ಸಸರಾ ಆದ್ ಪೋಂಡು. ಆಂಡಲಾ ನಮ ಮಾತ್ರ ಯಾನ್ಲಾ ಕಮ್ಮಿಜ್ಜಿ ಪನೊಂದು ಪಾಡೊಂದೇ ಪೋಯ.. ಯಾನೊರಿ ಬೆಸ್ಟ್ ಫೋಟೋಗ್ರಾಫರ್ ಆವೊಡು ಪನೊಂದು ನಮ ದಿನೊಕ್ಕೊಂಜಿ ದೈವದ ಚಿತ್ರೊನು ಪಾಡಂದೆ ಪೋಯ ನರಮಾನಿನ ಮೋನೆಗ್ ಬಣ್ಣ ಪೂಜಿನವೆನ್ ಮಾತ್ರ ತೂಯಿನ ಅರ್ಥ ಆವಂದಿನ ಮಂಗಗ್ ಅವ್ವೊಂಜಿ ತೆಲಿಪುನ ಏಸ ಆದ್ ಪೋಂಡು. ಅಪನಗ ಎಚ್ಚರಿಗೆ ಆಯಿನ ನಮ ಆಯಗ್ ನೆರ್ಯರ ಪೋಯ.... ಆಂಡ ಉಂದು ತಪ್ಪು ಏರೆನ????.

ನಮ್ಮನೆ ತಪ್ಪು.. ನಮ್ಮ ಆಚಾರ ವಿಚಾರ ನಂಬಿಕೆನ್ ಮೂಜಿನೆದಾಯನ ಕೈಕ್ ಕೊರ್ನವ್ವು. ನಮ್ಮನೇ ತಪ್ಪು ದೈವೊಲೆನ ಚಿತ್ರಲೆನ್ ಸೋಷಿಯಲ್ ಮೀಡಿಯಾಡ್ ಪಾಡಿನವ್ವು, ನಮ್ಮನೇ ತಪ್ಪು ದೈವೊದ ಪೊರ್ಲ ನಲಿಕೆನ್ ಭಕ್ತಿಡ್ ತೂದು ಕಣ್ಣ್ ದಿಂಜಾವೊಂದು ಮನಸ್ ದಿಂಜಾವೊನಂದೆ ಮೊಬೈಲ್ಡ್ ಮೊಮೆರಿ ಪಂದ್ ದೀವೊನವ್ವು. ಉಂದೆಟ್ ಏರೋ ಒರಿ ಅರ್ಥ ಆವಂದಿನ ಮೂಜಿನೇ ಜನತ ದಾದ ತಪ್ಪು ಉಂಡು ಪನ್ಲೆ ತೂಕ?? ನಮಡನೇ ತಪ್ಪು ದೀವೊಂದು ಏರೋ ಒರಿ ಅರ್ಥ ದಾಂತಿನಾಯಡ ತಾಂಟುನಲಾ ನಮ್ಮ ತಪ್ಪೇ ಅತಾ???

ದಾದಲ ಆವಡ್ ಪೋಯಿನ ಪೊರ್ತು ಪಿರ ತಿಕ್ಕಂದ್ ಆಂಡ ಈ ಮಂತಿನ ತಪ್ಪುಗು ಪ್ರಾಯಶ್ಚಿತ ಆದ್ ನನಾಂಡಲಾ ನಮ್ಮ ದೈವ ದೇವೆರೆನ ಚಿತ್ರೊಲೆನ್ ಮೂಜನೇ ಜನತ ಕೈಕ್ ತೆಲಿಕೆದ ವಸ್ತು ಆಪಿನವೆನ್ ತಪ್ಪಾಗನ?? ದಾದ ಪನ್ಪರ್???

ಯಶು ಬೆಳ್ತಂಗಡಿ.